The Fig · at-Tin · سورة التين · 8 ayahs

القرآن الكريمOffice of the President of Maldives

بِسْمِ اللَّهِ الرَّحْمَٰنِ الرَّحِيمِ

رحمن ވަންތަ رحيم ވަންތަ اللَّه ގެ اسم ފުޅުން ފަށައިގަންނަމެވެ.

وَالتِّينِ وَالزَّيْتُونِ

ވައްތީންޏާއި، ޒައިތޫނި ގަންދެއްވަމެވެ.

وَطُورِ سِينِينَ

އަދި طورسينا ގަންދެއްވަމެވެ.

وَهَٰذَا الْبَلَدِ الْأَمِينِ

އަދި أمان ކަން ލިބިގެންވާ މި ރަށް (އެބަހީ: مكة) ގަންދެއްވަމެވެ.

لَقَدْ خَلَقْنَا الْإِنْسَانَ فِي أَحْسَنِ تَقْوِيمٍ

ހަމަކަށަވަރުން، ތިމަންރަސްކަލާނގެ، އެންމެ ރިވެތި صورة ގައި އިންސާނާ ހެއްދެވީމެވެ.

ثُمَّ رَدَدْنَاهُ أَسْفَلَ سَافِلِينَ

ދެން ތިމަންރަސްކަލާނގެ، އެ އިންސާނާ (ނަރަކައިގެ) އަޑީގެ އެންމެ އަޑިޔަށް ރައްދުކުރެއްވީމެވެ.

إِلَّا الَّذِينَ آمَنُوا وَعَمِلُوا الصَّالِحَاتِ فَلَهُمْ أَجْرٌ غَيْرُ مَمْنُونٍ

إيمان ވެ صالح عمل ތައްކުޅަ މީހުން މެނުވީއެވެ. ފަހެ، އެއުރެންނަށް، ކެނޑިގެން ނުދާނޭ ދަރުމަ ހުއްޓެވެ.

فَمَا يُكَذِّبُكَ بَعْدُ بِالدِّينِ

އެއަށްފަހުވެސް ޖަޒާދެއްވުމުގެ ދުވަހާމެދު إنكار ކުރަން، ތިބާޔަށް ޖައްސަނީ ފަހެ، ކޮންކަމެއް ހެއްޔެވެ؟

أَلَيْسَ اللَّهُ بِأَحْكَمِ الْحَاكِمِينَ

حكم ކުރައްވާ އެންމެ عدل ވެރި ރަސްކަލާނގެ ކަމުގައި، اللَّه ވޮޑިގެންނުވޭހެއްޔެވެ؟