The Constellations · al-Buruj · سورة البروج · 22 ayahs

١وَالسَّمَاءِ ذَاتِ الْبُرُوجِ

1Jewe Allah, Ndarahiye kw’ijuru rifise inzira-ntasobwa z’izuba n’ukwezi!

٢وَالْيَوْمِ الْمَوْعُودِ

2No ku musi w’isango ryategekanijwe ry’izuka ry’ibiremwa!

٣وَشَاهِدٍ وَمَشْهُودٍ

3No ku cabona cagiriza no ku wagirizwa1!

٤قُتِلَ أَصْحَابُ الْأُخْدُودِ

4Harahonejwe abantu Benibinogo amahanga bimbiye abemeramana;

٥النَّارِ ذَاتِ الْوَقُودِ

5Baraheza bavyatsamwo umuriro wenyegejwe;

٦إِذْ هُمْ عَلَيْهَا قُعُودٌ

6Igihe bari bicaye hambavu yavyo;

٧وَهُمْ عَلَىٰ مَا يَفْعَلُونَ بِالْمُؤْمِنِينَ شُهُودٌ

7Bitegereza ivyo bakorera abemeramana mu bihano.

٨وَمَا نَقَمُوا مِنْهُمْ إِلَّا أَنْ يُؤْمِنُوا بِاللَّهِ الْعَزِيزِ الْحَمِيدِ

8Nta na kimwe babahoye atari uko bemera Imana Imwe Rudende Allah, Nyenintsinzi-Mutaneshwa, Nyenugushimwa, Ishimwa ku mazina, amatazirano n’ibikorwa vyayo mu bihe vyose.

٩الَّذِي لَهُ مُلْكُ السَّمَاوَاتِ وَالْأَرْضِ ۚ وَاللَّهُ عَلَىٰ كُلِّ شَيْءٍ شَهِيدٌ

9Ni Yo Nyenubwami, Igaba Ikaganza amajuru n’isi n’ibiri muri vyo vyose. Burya Imana Allah, Irazi ikintu ico ari co cose.

١٠إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ

10Mu vy’ukuri, abatoteje abemeramana n’abemeramanakazi mu kubaturira kugira bavavanure n’idini ry’Imana Allah, hanyuma ntibigaya ku Mana Allah ngo basabe imbabazi, abo bazohanwa mu muriro wa Jahannamu, baranategekanirijwe ibihano vyo guturirwa.

١١إِنَّ الَّذِينَ آمَنُوا وَعَمِلُوا الصَّالِحَاتِ لَهُمْ جَنَّاتٌ تَجْرِي مِنْ تَحْتِهَا الْأَنْهَارُ ۚ ذَٰلِكَ الْفَوْزُ الْكَبِيرُ

11Mu vy’ukuri, abemeye Imana Allah n’Intumwa yayo bakanakora n'ivyiza bitegetswe, barategekanirijwe imirima itotahaye mu Bwami bw’ijuru, musi y’ibiti n’inyubakwa vyabwo hatemba inzuzi. Iyo, ni yo ntsinzi ihambaye.

١٢إِنَّ بَطْشَ رَبِّكَ لَشَدِيدٌ

12Mu vy’ukuri, uguhana kw’Imana yawe Rurema Allah kurahambaye.

١٣إِنَّهُ هُوَ يُبْدِئُ وَيُعِيدُ

13Mu vy’ukuri, ni Yo Yatanguje kurema ibiremwa vyose ata co Irinze gufatirako, kandi ni Yo Izobisubiza ubuzima, biheze bizuke.

١٤وَهُوَ الْغَفُورُ الْوَدُودُ

14Ni na Yo Nyenimbabazi-ntangere ku bigaya, Nyenurukundo-ntangere ku batoni bayo.

١٥ذُو الْعَرْشِ الْمَجِيدُ

15Nyenubuhangamo, Nyeniteka.

١٦فَعَّالٌ لِمَا يُرِيدُ

16Ikorana ubwira ico Ishatse, ntakiyinanira.

١٧هَلْ أَتَاكَ حَدِيثُ الْجُنُودِ

17Ntumwa y’Imana! Mbega, woba warashikiriwe n’inkuru y’ivyashikiye ingabo z’abagarariji!

١٨فِرْعَوْنَ وَثَمُودَ

18Ingabo za Firawuni n’iza Bene Thamuudi!

١٩بَلِ الَّذِينَ كَفَرُوا فِي تَكْذِيبٍ

19Ahubwo abagararije Imana Allah bishinga kubandanya bahakana nk’ab’aho hambere.

٢٠وَاللَّهُ مِنْ وَرَائِهِمْ مُحِيطٌ

20Burya Imana Allah na Yo ku bushobozi n’ubumenyi vyayo, Irabakikuje ku mpande zose, nta buhungiro.

٢١بَلْ هُوَ قُرْآنٌ مَجِيدٌ

21Iyo Qor’ani bahakana, si amajambo y’abantu! Ahubwo, ni Qor’ani ntagatifu;

٢٢فِي لَوْحٍ مَحْفُوظٍ

22Yanditswe ku kibaho kibungabunzwe neza “Lawhu Mahfuudhw”.